Pangutana : Kon pangulo pa si Pedro asa man sa bibliya nga gisugo siya sa pagpa-ngulo sa iglesia? Asa man mabasa nga siya niangkon nga pangulo kay basi kamo lamang ang nag-ingon nga nahimo siya nga pangulo apan wala diay siya nakahibalo?
Tubag: Una sa tanan ang simbahan o iglesya diha sa iyang pagsukad sa panahon ni Kristo sa iyang pagkatukod nag-ila na ni San Pedro nga pangulo. Kinsay nagsugo niya? Ang ato gayod nga Ginoong Hesukristo maoy naghatag niyag gahom sa pagdumala. Asa mabasa? Mat. 16:18-19. Ania: “...Ihatag ko kanimo ang yawe sa gingharian sa langit; ang imong pagagapuson maginapos sa langit ug ang imong pagabadbaran binadbaran sa langit.” Nan, klaro nga gihatag gayod kaniya ang gahom sa pagdumala. Atong timan-an nga ang hinatagan ug yawe bisan diha sa Daang kasabutan mao man ang may gahom sa pag-abri– ug pagsira sumala sa libro ni Profeta Isaias 22:22.Ania: “Ug isangon ko sa iyang abaga ang yawe pag-abli sa balay ni David; siya’y moabli niini ug walay makasira; mosira siya niini ug walay maka-abli.” Busa diha usab sa Mat. 28-19-20 si Kristo nagsugo sa tanang mga tinun-an ug mga apostoles sa pagsangyaw sa tibook kalibutan aron paghimo sa tanan nga iyang mga tinun-an diha sa pagbunyag sa ngalan sa Amahan sa Anak ug sa Espiritu Santo. Diin usab siya miingon nga mag-uban hangtod sa kahangturan.
Ug kanang pangutana nga si San Pedro ba miangkon nga siya pangulo naa gihapon sa bibliya tungod luwas nga giingnan siya sa atong Ginoo nga pasibsiba ang akong mga karnero (Juan 21:15-17) siya mismo miingon nga siya pa-ngulo usab. Asa mabasa? Naa sa 1 Pedro 5:1-2... nga ang iyang katungod gigamit gayod niya. Ania atong kutlo-on: “ Naghangyo ako sa mga pangulo diha sa inyong iglesia, ingon nga ako pangulo usab sama kaninyo. Saksi ako sa pag-antos ni Cristo, ug makaambit ako himaya nga ipadayag unya. Naghangyo ako kaninyo nga bantayan ninyo pag-ayo ang katawhan nga gitugyan sa Dios kaninyo…” . (Maayong Balita Bibliya—Cebuano)
Busa dakong kamatooran nga dili malungi diha sa balaang kasulatan! Si kinsa man kita nga dili motoo niana? Busa agdahon tang tanan katawhan nga mobalik na ngadto sa sabakan sa Sta. Iglesia. -o0o-
